قومی کرکٹ ٹیم کے کپتان بابر اعظم بھارت میں جیت کے لیے پرعزم ہیں۔
 |
ورلڈ کپ 2023 بھارت میں شروع ہو رہا ہے،شائقین کرکٹ بےتاب
شائقین کرکٹ کا انتظار ہوا ختم وہ لمحہ آن پہنچا ، ورلڈ کپ 2023 کا آغاز گزشتہ روز ہوگیا، آج جمعہ کے دن پاکستانی کرکٹ ٹیم انڈیا میں منعقدہ آئی سی سی ورلڈ کپ میں اپنا آغاز حیدرآباد کے راجیو گاندھی انٹرنیشنل کرکٹ اسٹیڈیم میں نیدرلینڈز کے خلاف میچ سے کرے گی۔
ایک لمبے عرصے کے بعد بھارت میں آنے والی پاکستان کرکٹ ٹیم نے حیدرآباد دکن میں کئی ٹریننگ سیشنز کیے، قومی ٹیم نے حیدرآباد میں 2 نیوزی لینڈ اور آسٹریلیا کے خلاف 2 وارم اپ میچ بھی کھیلے تاکہ خود کو یہاں کے موسم سے ہم آہنگ کرسکے۔ حیدرآباد میں پاکستانی ٹیم ورلڈ کپ کے 9 میچوں میں سے 2 میچز کھیلے گی۔ وارم اپ میچز سے پاکستانی ٹیم کو اپنے کامبی نیشن کو تیار کرنے اور تمام کھلاڑیوں کو پریکٹس کے بھرپور مواقع ملے ہیں۔
قومی ٹیم کےکپتان بابراعظم نے کہا کہ ہماری تیاریاں بہت اچھی ہیں۔ ہم پچھلے ایک ہفتے سے حیدرآباد میں ہیں قومی ٹیم کے کپتان نے کہا کہ ہم نے دو پریکٹس میچز میں مختلف کامبی نیشن آزمایا ہے اور ہر کھلاڑی کو موقع دیا ہے تاکہ دیکھ سکیں کہ وہ ہر قسم کے حالات میں کھیل سکتے ہیں، ٹیم کا ہر کھلاڑی اپنی بہترین کارکردگی دکھانے کے لیے تیار ہے۔
پاکستانی ٹیم ورلڈ کپ کی فیورٹ ٹیموں میں سے ایک ٹیم ہے، کپتان بابراعظم نے خود کو ماڈرن ڈے کرکٹ کے بہترین بیٹسمین کے طور پر پیش کیا ہے۔ 2019 کے عالمی کپ میں بابر اعظم پاکستان کی طرف سے سب سے زیادہ رنز بنانے والے بیٹسمین تھے جس کے بعد سے وہ آئی سی سی عالمی ون ڈے رینکنگ میں پہلے نمبر پر آچکے ہیں۔
گزشتہ چار سال کے دوران بابر اعظم نے ون ڈے انٹرنیشنل میں 2196 رنز بنائے ہیں ان کی بہترین اوسط 66 رہی ہے جبکہ اسٹرائیک ریٹ 93 رہا ہے جس میں نو سنچریاں اس عرصے میں شامل ہیں۔
شاہین آفریدی کو اس ورلڈ کپ میں پاکستانی پیس اٹیک میں کلیدی حیثیت حاصل ہوگی۔ مداحوں کی نظریں شاہین پر جمی ہوئی ہیں۔ پاکستان کے شائقین کرکٹ کی امیدیں بھی شاہین شاہ سے ہی وابستہ ہیں۔ وہ گزشتہ ورلڈ کپ میں ایک میچ میں پانچ وکٹ لینے والے سب سے کم عمر بولر بنے تھے ۔
حارث رؤف نےحالیہ ایشیا کپ میں اپنی ون ڈے کی پچاس وکٹیں مکمل کی ان کی بولنگ کی سب سے خاص بات ان کی اکانومی ہے جو پانچ اعشاریہ چھ آٹھ ہے۔
بابراعظم کا کہنا ہے کہ بولنگ اور بیٹنگ دونوں ہماری قوت ہیں۔ ہمارے بیٹرز ٹاپ آرڈر سے لوئرآڈر تک اچھا پرفارم کررہے ہیں ہر ایک اپنی ذمہ داری محسوس کررہا ہے ۔ بولنگ میں ہمارے تیز بولرز ہمیشہ ہماری قوت رہے ہیں لیکن ہمارے اسپنرز بھی مڈل اوورز میں وکٹیں لے رہے ہیں جو اچھی علامت ہے۔
بابراعظم کا کہنا تھا کہ بھارت میں پچز اچھی ہیں اور ہائی اسکورنگ میچز ہونگے۔ باؤنڈریز نہ بہت بڑی ہیں اور نہ بہت چھوٹی ۔ یہ نارمل سائز کی ہیں۔ اتارچڑھاؤ بھی آئے ہیں جو فطری امر ہے۔ چیلنجز بھی رہے ہیں لیکن ہم نے شائقین کی توقعات پر پورا اترنے کی کوشش کی ہے اس عرصے میں وہ اچھے لوگوں سے بھی ملے ہیں اور اچھے ٹیم کے ساتھیوں سے بھی ملے ہیں اور کوشش کی ہے کہ ٹیم کو متحد رکھ سکوں۔
بابراعظم نے کہا کہ گزشتہ تین برسوں سے وہ ان لڑکوں کے ساتھ کھیل رہے ہیں اور ہم سب ایک دوسرے سے جڑے ہوئے ہیں اور کوشش کرتے ہیں کہ پاکستان کے لیے بہترین کارکردگی دکھاسکیں۔
قومی ٹیم کے کپتان بابراعظم نے حیدرآباد میں پاکستانی ٹیم کے استقبال پر خوشی کا اظہار کیا بابر نے ان تمام لوگوں کاشکریہ بھی ادا کیا جنہوں نے ٹیم کی آمد پر اس کا پرجوش استقبال کیا۔
بابراعظم کا کہنا تھا کہ اگر پاکستانی شائقین بھی یہاں ہوتے تو یہ ہمارے لیے اور بھی زیادہ اچھا ہوتا۔ بہرحال بابر پاکستان کی جیت کے لیے پرعزم ہیں۔
